Follow
MANIFESTO GLOBAL PARA O 12 DE MAIO
Vivimos nun mundo dominado por unha minoría incapaz que impide una vida digna para todos os habitantes do planeta e que esnaquiza os dereitos básicos das persoas. Un mundo onde “se nos di” que non hai máis alternativa que a perda de dereitos acadados tras longas loitas, ou a renuncia a sequera gozalos.
Fomos construíndo un mundo no que o éxito tense asimilado “ao individual”, e no que se bloqueou a idea da posibilidade do triunfo colectivo. É máis, todo aquilo que non fomente a competitividade, a rendibilidade monetaria e o crecemento constante é presentado como disfuncional. Una ideoloxía que se ve reforzada pola hexemonía cultural dos grandes medios de comunicación, auténticos instrumentos para crear o consenso necesario ao redor deste sistema inxusto e insolidario.
Pero non quedamos calados. Espertamos as nosas conciencias, e estas sumáronse a unha vaga de conciencia colectiva que está a atravesar o planeta dunha beira á outra. Dende Túnez á Praza Tahrir, dende Madrid a Reijkiavik, dende Nova Iorque a Bruxelas, os pobos do mundo alzáronse, na Primavera Árabe, na Dignidade Islandesa, na Indignación do 15M ou na Ocupación de Wall Street. Todos unidos denunciamos o estado actual do mundo. O noso esforzo serviu para dicir basta xa a escala mundial, e comezar a forzar trocos, aínda nacentes, pero nos que seguiremos avanzando.
É por iso que nós, mulleres e homes, habitantes deste planeta, decidimos libre e fraternalmente facer ouvir a nosa voz outra vez este 12 de Maio en todo o mundo, para denunciar o estado actual do noso planeta, e esixir a aplicación doutras políticas diferentes, destinadas ao fomento e promoción do ben común.
Denunciamos que coa actual distribución dos recursos económicos só unha minoría moi pequena escapa da pobreza ou a precariedade. As xeracións futuras están condenadas a recibir una herdanza envelenada debido aos riscos medioambientais provocados por moi poucos para o seu beneficio. Os sistemas políticos democráticos, alí onde os hai, foron baleirados de senso case na súa totalidade, poñéndoos ao servizo dos mesmos que só están interesados en aumentar o beneficio para as súas corporacións ou institucións financeiras, sen importar o destino do planeta ou dos seus habitantes.
Tamén denunciamos que a actual crise non é un accidente natural. Foi provocada polos mesmos que levaron ao mundo ata esta situación. Coa axuda dunha ciencia económica que perdeu o seu senso orixinario de xestión do ben común, para converterse en ideoloxía ao servizo do poder financeiro, pretenden impor medidas que abafan aínda máis a miles de millóns de persoas, sen pedirlles permiso, tan só argumentando que non hai outra solución posible. Din que debemos deixar o noso futuro en mans dos mesmos expertos que o están destruíndo.
En Vigo e comarca estámolo a padecer en tódolos eidos: o naval agoniza polas políticas de descapitalización aplicadas nestes anos; o sector público, a sanidade e a educación están ameazadas pola privatización da súa xestión; a cultura está sendo desartellada de xeito interesado; a innovación semella desbotada como fórmula de apoio ao modelo produtivo local; e o sistema financeiro público está a ser devorado pola banca privada.
Pero tamén, aquí e agora, voltamos. Espertamos e xa non só para laiarnos. Agora apuntamos aos verdadeiros causantes da crise, ás súas políticas e ás súas mentiras disfrazadas de baleira retórica. E propomos alternativas ás súas políticas, que permitan remediar a actual situación e avanzar cara a un mundo máis democrático, onde reinen os valores da liberdade, a igualdade e a fraternidade. O vello soño dos nosos antepasados cando se ergueron contra a opresión no pasado por todo o planeta. Un mundo onde cada home ou muller teña garantido o dereito á libre busca da ledicia, persoal e colectiva.
